لە شارێکی پڕ لە ئاپۆراى مرۆڤ و
لەنێو تەلارێکی بەرزی،
بازاڕی رەشی سەرمایەو
لەسەر مێزی قومارخانەیەکى شاردا
دواى مەستبوونی خواپێداوانی کۆمەڵگا
باوکێک گرەو دەدۆڕێنێ و
تەنها بەنووکی خامەیەک
کچێک بە سەنگ و رەنگییەوە
دەخرێتەسەر پارچە کاغەزێکی رەنگین،
لە مرۆڤیی دادەشۆرێ و
دەکرێتە (چەک)!!
هەر لەو شەوى ویژدان دۆڕانەی سەرمایە
هەر ئەو (چەک)ە،
لە چەندان مەرجا دەدۆڕێ و
لەمدەستەوە بۆ ئەویان و
لەویشییانەوە بۆ ئەمیان!
تا دەرئەنجام:
دوای ئەو هەڕاج هەڕاجێنە
لە پیاوێکی سمێڵ بابڕ مارەدەکرێ و
هەرچى خەون و خولیای هەیە
دەبن بە تراویلکەی مەرگ و
بەناخیدا دەچنەخوارێ،
ئاواتەکان، هەڵدەوەرێن..
بێهیوایی لە ئەرخەوان بوونى ژیان
هێرش دێنێ و
بۆ سبەینێ:
ئەو خاتوونە، شەنگ و شۆخە،
تف لە کەلتوورى کۆن دەکا و
خۆی دەسوتێنێ!.