64هەمین ساڵوەگەڕی دامەزراندنی كۆماری مەهاباد لەهەموو گەلی كورد پیرۆز دەكەین و سەری رێزونەوازش لەبەردەم هەموو شەهیدانی رێگای ئازادی نەتەوەیی ودیموكراتی دادەنوێنین.
گەلەكەمان مێژوویەكی دوورودرێژە رووبەرووی سیاسەتی چەوساندنەوە و لەناوبردنی و تواندنەوەی ناسنامەیی نەتەوەیی دەبێتەوە لەلایەن داگیركەرانی كوردستان و دەسەڵاتدارانەوە دەچەوسێندرێتەوە. گەلی كوردیش بۆ بەرەنگاربوونەوەی ئەو سیاسەتەو بەدەستهێنانی مافە نەتەوەیی ودیموكراتییەكانی بەردەوام لەتێكۆشان دا بووەو كۆماری مەهابادیش یەكێكە لەو دەستكەوتە نەتەوەیی گەلەكەمان كە بەهەوڵ وتێكۆشان و قۆربانیدانێكی بێ وێنە بەدێ هات. هەرچەندە تەمەنی ئەم كۆمارە یازدە مانگ بوو، بەڵام وەك یەكەمین كۆماری كوردی و بەشداری كورد لەبەشەكانی تری كوردستان توانی گەلێك دەستەكەوتی نەتەوەیی لە بواری فەرهەنگ و كەلتووری كوردی ئاوا بكات.
گەلی نیشتمانپەروو ئازادیخواز:
ئاشكرایە كە دۆژمنان هەمیشە بۆ سەركوتكردنی تێكۆشانێك و پێشخستنی كەلتووری تەسلیمكاری رێبەر وپێشەنگەكانیان كردۆتە ئامانج. دەوڵەتی ئێران و هاوپەیمانیەتیەكانیان پێیان وا بوو، بە لەسێدارەدانی پێشوا قازی و هاورێبازانی دەتوانن ئێرادەی گەل بشكێنن و كۆتایی بە بزووتنەوەی ئازادیخوازی گەلەكەمان بهێنن، بەڵام لەو رۆژەوە هەتا رۆژی ئەمڕۆ گەلەكەمان لەهەر چوار بەشی كوردستان لەسەر پێیەو بەچەندین قۆربانی و تێكۆشان توانی گەلێك دەستكەوتی نەتەوەیی و دیموكراتی بەدەست بهێنێ، بەڵام لەبەرامبەر بەمانەش پیلانگێڕان و داگیركەرانی سەر كوردستان پەرە بە پیلانەكانیان دەدەن لەدژی ئێرادەی گەلەكەمان. لەهەر چوار بەشەكەی كوردستان بەتایبەتیش لە باكوورو رۆژئاواو رۆژهەڵاتی كوردستان.
رۆژ بەرۆژ گۆشەگیری و ئەشكەنجەی لەسەر رێبەری گەلی كورد بەرێز عەبدوڵڵائۆجەلان و زیندانی كردن و لە سێدارەدانی كادیرانی سیاسی لە زیاد بووندایە.
لە بەرامبەر هەموو ئەم ڕاستیانە تەواوی دەوڵەتانی سەردەستی جیهان بێ دەنگن . دەوڵەتانی داگیركەری كوردستان و جیهان بەردەوام لە داڕشتنی پیلانگێڕیدان و سەرەڕای هەبوونی ناكۆكیەكانیان لە دژبەرایەتی كردنی ئێرادەی گەلی كورد هاوسۆز و هاوپەیمانن.
هەر بۆیە ئەم هەڵوێستانە گەورەترین هەڕەشەن لە سەر دەسكەوتە نەتەویەكانمان و هەوڵدانە بۆ دووبارەكردنەوەی هێرشە پاكتاو كاریەكان و دووبارە كردنەوەی مێژوو.
لە سەر رۆشنایی ئەم راستیانە و گەرەنتی كردنی و بە دەستهێنانی تەواوەتی مافە نەتەویی و دیموكراتیەكانمان ئێمە وەكوو پارتی چارەسەری دیموكراتی كوردستان پێمانوایە كە ئەركی سەرشانی هەموو كوردێكە كە كار بكات بۆ ئەوەی فشار لە سەر هەموو هێز و لایەنە سیاسیەكان لە كوردستان دا دروست بكەن بۆ ئەوەی هەستن بە سازدانی كۆنفرانسێكی نەتەویی بۆ تەواوی كێشە نەتەویی و دیموكراتیەكانمان و گەرەنتی كردنی دەسكەوتەكانمان ، ئەویش بە پشتیوانی هێًز و ئێرادەی جەماوەرەوە پێكدێت.
پێویستە هەموو هێز و لایەن و پارتەسیاسیەكان لە كوردستاندا بە تایبەتی لە باشووری كوردستاندا لەم بوارەدا باش كار بكەن و بە ئەركی مێژویی خۆیان هەڵسن و خاوەن هەڵوێست بن لە بەرامبەر ئەو هێرشە ئایدۆلۆژیانەی كە رووبەرووی گەلەكەمان دەبێتەوە لە هەر سێ بەشەكەی تری كوردستاندا .
دەستەی كارگێڕی
پارتی چارەسەری دیموكراتی كوردستان
22-1-2010