ئەگەر ڕۆژگاری ئەمڕۆ ڕۆژگاری هەرە بەگێژاوی كۆمەڵگای مرۆڤایەتییە‌و هیچ كاتێك مرۆڤایەتی بەو جۆرە‌و بەو ئاستەو وەها بەقووڵی لە گێژاودا نەژیاوە. ئەوا ژن لەناو ئەو گێژاوەدا تەوەری سەرەكییە، مسۆگەر ئەمەش هەروا بیهۆو بێ پیشینە نەهاتووە، بەڵكو هۆكاری خۆی هەیە‌و لە ئاكامی پڕۆسەیەكی قۆناخی مێژووییدا گەیشتۆتە ئەو ئاستەی كەوا ئیدی گێژاو نەك هەر چارەنووسی كۆمەڵگای مرۆڤایەتی خستۆتە مەترسییەوە، بەڵكو وا چارەنووسی ئەم هەسارەیەشی خستۆتە ژێر مەترسی ئەوەی كە ئیدی تادێت توانستی ژیانی تێدا كەم دەبێتەوە، هەڵبەتە ئەو ناهاوسەنگی‌و ناكۆییەی كەوا ئەمڕۆ لە شێوەدا لە تەوەری (ژن، پیاو، تاك، كۆمەڵگا، مرۆڤ، سروشت، مەعنەوی، ماددی.... هتد) دەسوڕێتەوە، لە بنەمادا هەم هۆكاری بنچینەیی ئەو گێژاوەن، هەمیش ئاكامێكی بنچینەیی ئەو گێژاوەن.
لەم وتارەدا ناكرێ قسە لەسەر خودی ئەو گێژاوەو هەوو ئەو تەوەرانەی ئاماژەیان پێدرا، بكرێ، بەڵكو زۆر بەپووحتی دەكرێ تیشك بخرێتە سەر ئەو تەوەرەی كە بەژن، پیاو ناوەزەد دەكرێ، خاڵەی كە ژن لە كوێی ئەو گێژاوەدایە، یان بڵێین ئەو گێژاوە تا چەند ڕەنگدانەوەی خۆی لەسەر خۆی لەسەر دۆخی ژیان ژن كردووە؟
وەك ئاماژەم پێ دا: ناكۆكی‌و ناهاوسەنگییەی كەوا لە ڕووكەشدا بە تەوەری (ژن_ پیاو) دەبینرێت، یەكێك لەو هۆكارە بنچینەییانەی كەوا ئەو گێژاوە سەرتاپاگیرییەی ئێستای كۆمەڵگای مرۆڤایەتی لێبەرهەم هاتووە، هەروەها بەهان شێوە یەكێك لە درئەنجامەكاننی خودی ئەو گێژاوەش.
گێژاوەكە گێژاوی خودی سیستەمی سەرمایەی جیهانییە، ئەو سیستەمە لەهەموو بوارو پانتاییەكانی كۆمەڵگادا (ئابووری، سیاسی، كولتووری‌و كۆمەڵایەتی.... هتد) لەناو گێژاو دایە، لەهەموو ئەو بوارو پانتاییانەشدا ژنان وەك مرۆڤ‌و وەك ڕەگەز قوربانی یەكەمی ئەو قەیرانەن، چونكە ئەو سیستەمە هەموو هەبوون‌و پێكهاتەیەكی كردۆتە سەرچاوەی قازانج‌و سەرمایەی. سێكسیش وەك سەرچاوەیەكی قازانج‌و سەرمایە بە پیشەسازی كراوە، بە پیشەسازیكردنی سێكسیدا لەگەڵ خۆیدا بەكاڵاكردنی جەستەی ژنانی هێناوە، تەنانەت لە میانەی ئەو بەكاڵاكردنەدا تەواوی ڕۆح‌و هەبوونیشی دەستەمۆ كردووەو كۆتایی بەو دۆخە هێناوە كە ژن لە سەردەمی چەرخی بەردینی نوێدا وەك خواوەندە دایكۆ خواوەندە ژن خاوەن پێگەبووە.
سیستەم سەرمایەی جیهانی سیستەمێكە لەسەر بنەمای قازانج‌و سەرمایە ڕەگەی خۆی داكوتاوە، هەر شتێك ببیتە سەرچاوەی قازان‌و سەرمایە، ئەوا بەبێ لەبەرچاوگرتنی هەموو بەها مرۆڤایەتیەكان، هەوڵی بەدەستخستن‌و دەستەمۆكردن، یان ڕاستتر بڵێین هەوڵی بەكاڵاكردنی داوە، بەپیشەسازیكردنی سێكس چییە؟ كاتێك كەسێكس (زایەندی) وەك كارگەیەك كە جەستەی ژن دەهاڕێت‌و دەیكات بە كاڵایەكی شایستە بە كڕین‌و فرۆشتن، ئەوا لە ناوەڕۆكی خۆیدا ڕۆڵی پڕۆسەی بەپیشەسازیكردن دەبینێت، لە بنەڕەتیشدا پیشەسازی خۆی ستوندێكی سەرەكی هاتنە ئاراو پەرەسەندنی سیستەمی سەرمایەدارییە.
لەمیانەی پیشەسازی زایەندبازی (سێكسركردن)دا ئیدی زایەندی لە جەوهەرو ماهییەتی خۆی دەردەچێتك كە فاكتەرێكی هەستكردن بە ژیان‌و ئەبەدیكردنی ژیانە، بەمەش زایەندیكردن، بازرگانی دەمێنێتەوە، كە دەبێتە مایەی قازانج‌و سەرمایە، ئیدی زایەنكردن وەك شێوازێكی پەیوەندی كۆمەڵایەتی واتای خۆی، كە بەردەوامیدانە بە ژیانی كۆمەڵایەتیانەی مرۆڤ، لەدەست دەدات‌و دەبێتە شێوازو ئاماڕازێكی لەناوبردنی كردە (پڕۆسە)ی بەكۆمەڵگابوون‌و پاشانیش كۆتایی هێنا بە ژیان‌و لەدەستدانی سیفەتی بەردەوامبوون‌و ئەبەدییەت.
لەمانە هەمووی مەترسدارتر ئەوەیە كە لەپاڵ بەپیشەسازیكردنی وەرزش‌و بەپیشەسازیكردنی كلتوری دا، پیشەسازی زایەندی (بە پیشەسازیكردنی سێكس) بۆتە یەكێك لە ئامڕازە هەر بەكاریگەرەكانی باڵادەستێتی‌و هەژموونگەرایی سیستەمی سەرمایەداری. لەمەشدا بەگوێرەی زیهنیەتی قازانجگەرایی ئەو سیستەمەدا: جەستەی ژن كاڵای هەر نایابە بۆ قازانجكردن، تەنانەت بۆتە پشەسازییەكی زۆر فراوان‌و مەزن‌و ئاسان، چونكە ئەو پشەسازییە وەك پیشەسازییە ئاساییەكانی تر پێویستی بە ماددەی خامی شاراوە‌و گرانبەها‌و دوورە دەست نییە، پێوستی بە تەكنەلۆژیای زۆر زەبەندنییە، باج‌و زەرییەو گومرگی زۆری لەسەر نییە، پێویستی تەنیاو تەنیا ئەوەی پێویستی پێیەتی، ژن‌و كارگەیەكی گەورەی ڕێكلامكردنەو بەس، هەر كاتێكیش ئەو جەستە بەكاڵابووەی ژن، قازانجی بەقەت بڕی تێچوو ڕێكلامەكە نەبوو، ئەوا وەك هەركاڵایەكی تری لەكەڵك كەوتوو، قڕێدەدرێت‌و پەراوێز دەخرێت، سیستەمی سەرمایەداری سیستەمی ڕێكلامە، ڕێكلامكردن بەكوردییەكەی واتا هەڕاجكردن، بەڵام ئەو هەڕاجكردنەی سیستەمی سەرمایەداری لەبنەڕەتدا تاڵانكردنی جەستە ژنە، بەتاڵانبردنی ڕۆح‌و هەبوونی ئیرادە‌و ناسنامەی ئێمەی ژنانە, لە سیستەمی سەرمایەداریدا شتێك نییە ناوی بەهاو پیرۆزییەكان بێت، تاقە شتێك بەهای هەیو پیرۆزە كە قازانجی بەداوە بێت.
بەڵام جۆن ژن لە هەبوونێكی مرۆڤانەی خۆیەوە گەیەنداراوەتە ئاستێك ڕازی بێت تەنیا وەك كاڵایەك بازرگانی پێوەبكرێت؟ چۆن ئەو سیستەمەی ژنی لە لوتكە گەیاندۆتە ئەو ئاستەی بەكاڵابوون‌و لە هەمانكاتیشدا زۆر شێلگیرانە بانگەشەی ئەوەش دەكات كە ئازادی هەرە زۆری بۆ ژن ڕەخساندووە؟ ئەی چۆن ژنیش لە میانەی ڕازیبوونی ئەو بەو سیستەمەو پەسندكردنی شێوە ژیان‌و زیهنیەتی ئەو سیستەمەوە واژۆی لەسەر ڕەوایەتی ئەو سیستەمە كردووە؟ مسۆگەر ژن وەك ڕەگەز وك مرۆڤ هەروا بەئاسانی نەگەیشتۆتە ئەو ئاستەی كەوا هەبوون‌و ناسنامەو ئیرادەی خۆمان لە دەست بدەین‌و تەنانەت لەبەكاڵاكردنی جەستەشماندا خاوەن ئیرادە‌و ڕاو بڕیار نەبێت، بەڵكو ئەو دۆخەی ژن بەپڕۆسەیەكی لە مێژینەی پێنج هەزار ساڵەدا تێپەڕێوەو لەسیستەمی سەرمایەداریشدا گەیشتۆتە لوتكەی بەزری خۆی.
پەیوەست بەم بابەتەوە گرنگە مرۆڤ بپرسێت؟ داخۆ پیاو وك مرۆڤ‌و وك ڕەگەز، وەك جەستە‌و وەك ئیرادە لەكوێی ئەو پیشەسازییەی زایەندییە؟ لەكوێی بەكاڵاكردن‌و بازرگانی پێكردنی جەستەی ژنان دایە؟ مسۆگەری سیستەمی سەرمایەداری وەك چۆن پەرەی بە سیستەمی بەكۆیلەكردنی ژن داوەو ئیدی واتای (ژن) لەواتا ڕەسەنكەی خۆی كە (ژیان)ە داماڵییوەو گەیاندۆتییە ئەو ئاستەی كە ژن واتاكۆیلە، ئەو پیاویشی لەدەرەوەی ئەو پڕۆسەی كۆیلەكردنەدا هێشتۆتەوە، بەڵكو لە میانەی (بەژنكردنی) پیاودا هەوڵی داوە سەرتاپای كۆمەڵگا بخاتە ژێر هەژموون‌و باڵادەستێتی خۆیەوە، تەنانەت لە میانەی ماكییەی ڕێكلامكردنە زەبەلاحەكانی ڕاگەیاندنەوە پڕۆسەی بەژنكردنی پیاو پڕۆسەی بەكالاكردنی وەك دوو پڕۆسەی تەواو كەری یەكتری لە ئاكامدا بە ژنكردنی كۆمەڵگا دەێنێت، كە لە بنچینەدا بەواتای كۆیلەكردن، ڕاستتر بڵێین بەمێگەلكردنی كۆمەڵگایە، بۆیە پێم وایە ئەگەر بڵێین سیستەمی سەرمایەداری سیستەمێكی پیاوسالارییە، ئەوا پێناسەكە كەموكوڕی تێدایە، چونكە تەنیا نیوەی ڕاستییەكانی لەگەڵ خۆیدا هەڵگرتووە، نیوەكەی تری ڕاستییەكە ئەوەیە كە سیستەمی سەرمایەداری لە هەمانكاتیشدا سیستەمی گەیاندنی پیاوە بەئاستی ژنی كۆیلەكراو، سیستەمی بەمێگەلكردنی كۆمەڵگایە، بۆیە سەیر نییە پیاوان لەسایەی ئەو سیستەمەدا هەموو هەوڵێكیان ئەوەبێت كە چۆن بتوانن لە ژن بچن، چۆن بتوانن خووی ئەو ژنانە بگرن كەتەواو كارەكتەری سیستەمیان بەرجەستە كردووە، ئیتر پیاوان لەهەڵگرتنی جانتای ژنانەو گوارە لەگوێكردن‌و ملوانكە لە ملكردن‌و خەزێم لە لوت چەقاندن‌و شێوازی هۆنینەوەی قژەوە بگرە تادەگاتە دیاردەی هۆمۆسێكسوالێتی (نێربازی)‌و گۆڕینی ڕەگەزی‌و... هتد. سەرجەمی ئەو دیاردانە ڕەنگدانەوەی ڕووكەشی ئەو پڕۆسەیەیە كە بەژنكردنی پیاو ناوزەدمان كرد، بۆیە دەكرێ بڵێین كە لەسایەی هەژموونگەرایەی‌و باڵادەستێتی سیستەمی سەرمایەداریدا، ئەو ناوهاوسەنگی‌و ناكۆكییەی كەوا لەتەوەری (ژن- پیاو) دا شێوەو فۆڕمیلەی پێدەدرا، ئێستا ئەمە تاڕادەیەكی زۆر تێپەڕیوەو گەیشتۆتە ئاستێك كە دەكرێ بەناكۆكی‌و ناهاوسەنگییەك كە لە تەوەری (سیستەمی سەرمایەداری، كۆمەڵگاو سروشت) چڕبۆتەوە، ناوزەد دەكرێت.
مسۆگەر ئەم بابەتە شرۆڤەو لێكدانەوەی زیاتری پێویستە. بەڵام ئەوەی گرنگە مرۆڤ ڕاستینەی سیستەمی سەرمایەداری لە ڕاستینەی كارەكتەری ئەو ژنەدا بینێ كە چۆن لە تەواوی ئیرادەو تایبەتمەندییەكانی ژیری سۆزداری خۆی داماڵراوەو تەواو وەك جەستەیەكی بەكاڵاكراو، لەمیانەی كارگەیەكی زەبەلاحی زێكلامكردندا چۆن هەڕاج دەكرێت‌و چۆن بازڕی گەرمی بۆ دەكرێت‌و چۆنیش ئەو سیستەمە دەخوازێت لەمیانەی بەژنكردنی پیاوانیشدا بەسەر تەواوی كۆمەڵگادا زاڵ ببێت‌و لە جیاتی ئەبەدییەتكردن‌و واتادان بە ژیان دەبەدیتكردنی قازانج‌و سەرمایەی بەبنچینە وەردەگرێت.